By: NEHAL INAYAT GILL
اِک کالیاں راتاں ، اِک سرد مہینہ
ترا ہجر وچھوڑا ، میرا ساڑے سینہ
اَکھیاں دے خالی کاسے وچ دیدار دا سَکہ پا جا نی
تینوں سونہاں میرے پیار دیاں اِک واری مڑ کے آ جا نی
ترے نال گزارے پل دی مالا چُمدا ہاں
میں شہر ترے دیاں گلیاں دے وچ کُمدا ہاں
میری روح چلی گئی مدتاں دی اِس بُت نوں وی دفنا جا نی
تینوں سونہاں میرے پیار دیاں اِک واری مڑ کے آ جا نی
مینوں مار دے طعنے روز شہر دے لوکی نی
میری رل مل سب نے کیتی زندگی اوکھی نی
مینوں مار دینا سب لوکاں نے ہائے آ کے یار بچا جا نی
تینوں سونہاں میرے پیار دیاں اِک واری مڑ کے آ جا نی
میں زہر جدائیاں والا سجناں پینا نہیں
میں مر جانا اے اور ترے بن جینا نہیں
احسان کری بس آخری تُوں نہالؔ دی نبض رُکا جا نی
تینوں سونہاں میرے پیار دیاں اِک واری مڑ کے آ جا نی
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?