By: Ahmed Nadeem Qasmi
قرارِ جاں بھی تمھی، اضطرابِ جاں بھی تمھی
میرا یقیں بھی تمھی ہو، میرا گماں بھی تمھی
تمھاری جان ہے نکہت، تمھارا جسم بہار
میری غزل بھی تمھی، میری داستاں بھی تمھی
یہ کیا طِلسم ہے، دریا میں بن کے عکسِ قمر
رُکے ہوُئے بھی تمھی ہو، رواں دواں بھی تمھی
خدا کا شکر، میرا راستہ معیّن ہے
کہ کارواں بھی تمھی، میرِ کارواں بھی تمھی
تمھی ہو جس سے ملی مجھ کو شانِ استغنا
کہ میرا غم بھی تمھی، غم کے رازداں بھی تمھی
نہاں ہو ذہن میں وجدان کا دُھواں بن کر
افق پہ منزلِ ادراک کا نشاں بھی تمھی
تمام حُسنِ عمل ہوں، تمام حُسنِ بیاں
کہ میرا دل بھی تمھی ہو، میرِی زباں بھی تمھی
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?