By: dr.zahid Sheikh
خار زاروں میں مسافر کی طرح زیست مری
چل رہی ہے کسی انجان سی منزل کی طرف
جس میں ناکامیء الفت کے سو ا کچھ نہ ملا
لوٹ جاتی ہے نظر پھر اسی محفل کی طرف
سوچتا ہوں کہ محبت کے یہ ایاغ مرے
تیری آنکھوں کی شرابوں سے ہیں کتنے خالی
تیری آغوش سے مہکا نہ شبستاں میرا
آج پھر تیرے بنا رات ہے ڈھلنے والی
ایک موہوم سی امید رفاقت بھی نہیں
اب نہ لوٹیں گے وہ گزرے ہوئے ایام کبھی
جس نے بخشی تھی محبت کی مجھے پہلی کرن
اب نہ آئے گی وہ بیتی ہوئی اک شام کبھی
بارہا چاہا بھلا دوں تجھے فرقت میں مگر
یاد ہر لمحہ مجھے تیرا خیال آتا ہے
جیسے اگتے ہیں بیابانوں میں خود رو پودے
شب کی تنہائی میں یوں تیرا خیال آتا ہے
اب ستاروں کی بھی بارات ہے چلنے والی
آج پھر تیرے بنا رات ہے ڈھلنے والی
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?