By: muhammad nawaz
خواب پلکوں پہ سجا لیتی ہیں چپکے چپکے
رنگ پھولوں سے چرا لیتی ہیں چپکے چپکے
آنے والے حسین وقت کی آسیں لے کر
دل پہ پہرے سے بٹھا لیتی ہیں چپکے چپکے
بیٹھے بیٹھے کبھی خود سے بھی الجھ جاتی ہیں
دیپ یادوں کے جلا لیتی ہیں چپکے چپکے
سارا دن چہرے پہ مسکان سجا رکھتی ہیں
شب گئے اشک بہا لیتی ہیں چپکے چپکے
جب کبھی نارسائی حد سے گزر جاتی ہے
خود کو آئینہ بنا لیتی ہیں چپکے چپکے
سہتی جاتی ہیں ان کہی کہانیوں سے دکھ
روح پہ برف گرا لیتی ہیں چپکے چپکے
کسی کے پیار کی جنت نظیر دنیا میں
اپنی ہستی کو مٹا لیتی ہیں چپکے چپکے
گماں کی دلنشیں وادی میں سفر کرتے ہوئے
کونپلیں دل میں کھلا لیتی ہیں چپکے چپکے
در خیال سے چن چن کے وفا کے موتی
اپنے دامن میں سجا لیتی ہیں چپکے چپکے
ڈائری میں کسی کے نام کی لکھ کر نظمیں
تتلیوں کو ہی سنا لیتی ہیں چپکے چپکے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?