By: M Usman Jamaie
کِسی رات
محمد عثمان جامعی
روشنی سائے جگادیتی ہے
کتنی تصویریں ہیں ہر سائے میں
ان تصاویر سے ڈر لگتا ہے
آؤ سایوں کے اثر سے نکلیں
چلو گھر سے نکلیں
کھینچ کر گلیوں کے جسموں سے اندھیرا اوڑھیں
چھین کر سوتے مکانوں سے اندھیرا اوڑھیں
کتنی تنہا ہے سڑک
ساتھ اسے لے کے چلیں
بول خوابیدہ پہر
اور کسے لے کے چلیں!
چاپ قدموں کی کرے گفتگو سناٹے سے
رات سے بات کریں
خون آشام سوالات کریں
وہ سوالات اُجالے سے جو ڈر جاتے ہیں
در ودیوار پہ جب پہلی کرن رینگتی ہے
خاک ہوجاتے ہیں، اک پَل میں بِکھر جاتے ہیں
دور ویرانوں میں پھیلے ہوئے خالی لمحے
عکس وآواز کو ترساں یہ سوالی لمحے
ان کے کشکول لبالب بھردیں
اے چھلکتے ہوئے دل! آ تجھے خالی کردیں
اور پھر لوٹ چلیں
گھر، جہاں رہنا ہی ہے
صبح دفتر بھی ہے
دفتر
جسے سِہنا ہی ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?