By: Jiger Allahaabadi
اوپر سے آیا ہے فرمان
ٹاکنگ چھوڑ کے پسٹل تان
کیسا مذہب کیا ایمان
اپنے بھائی کی لے لو جان
اپنی قوت اپنی جان
آگ بنا ہے پاکستان
ایسا کھیل دکھایا ہے
الو سب کو بنایا ہے
حاکم بن کر آیا ہے
میرے دیس میں وہ مہمان
اپنی قوت اپنی جان
آگ بنا ہے پاکستان
زخمی مسلم کا سر ہے
کتنا پیارا منظر ہے
گلچین کا یہ آرڈر ہے
گلشن کو کر دو ویران
اپنی قوت اپنی جان
اپنی جان آگ بنا ہے پاکستان
اس کا ستارہ مایل اوج
یوں دشمن کی ہو گئی موج
اپنی پبلک اپنی فوج
اپنے بارود اپنے جوان
اپنی قوت اپنی جان
آگ بنا ہے پاکستان
اپنے گھر پر قابض غیر
اپنے پیاروں سے بیر
اپنی کلھاڑی اپنا پیر
اپنا نشتر اپنی ران
اپنی قوت اپنی جان
آگ بنا ہے پاکستان
آتش ہے ہریالی میں
گلشن کی پامالی میں
غیروں کی دلالی میں
اپنا زیاں اپنا نقصان
اپنی قوت اپنی جان
آگ بنا ہے پاکستان
سر اس در پر دھرتا جا
اپنی جیب کو بھرتا جا
ڈالر ڈالر کرتا جا
روپیہ پیسہ دین ایمان
اپنی قوت اپنی جان
آگ بنا ہے پاکستان
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?