By: Muhammad Shariq
کہا جاتا ہے کہ عشق امر ہے
محبت بیاں کی حدوں سے بالاتر ہے
کہتے ہیں محبت دلوں کا پیمان ہے
آنکھوں کی راحت، دل کا وجدان ہے
محبت محیط عالم بے نہایت پر
ہر روایت پر اور ہر درایت پر
محبت نہاں ہر انسان کے دل میں
محبت عیاں نور مہ کامل میں
محبت پوشیدہ بہار کی آمد میں
محبت خوابیدہ کلیوں کی نکہت میں
محبت کی نمود ہر شاخ گلاب میں
محبت کی قیود بے حد و حساب میں
محبت وادیوں میں سبزے کا نکھار
محبت گلستاں میں بلبلوں کی پکار
محبت کے جلوے زمیں سے آسماں تک
محبت ہویدا مکاں سے لا مکاں تک
محبت عالم کی روشنی، محبت عالم کا نور
محبت درماندگی میں امیدوں کا ظہور
محبت جلوہ گر چاند کی ٹھنڈی کرنوں میں
محبت لہلہاتے کھیتوں، گنگناتے جھرنوں میں
محبت پنہاں جذبوں کی حرارت میں
محبت نمایاں افعال کی شدت میں
محبت غنا میں، محبت ساز میں
محبت دل کی دھڑکنوں کی آواز میں
محبت وقت سفر آنکھوں کا ڈبڈباجانا
محبت ملن میں نینوں کا بھر آنا
محبت شمع کے گرد رقص پروانوں کا
محبت صحرا میں پابجولاں پھرنا دیوانوں کا
محبت خوابوں کا سفر ایقان تک
محبت پیہم جستجو زیست کے عرفان تک
محبت کسی کے لئے فنا ہوجانا
محبت خود صحرا بننا، خود دریا ہوجانا
محبت صبح دم نسیم بہار کا گنگنانا
محبت نوخیز کلیوں پہ تتلیوں کا منڈلانا
محبت سایہ فگن شارق کائنات پر
ہر شے پر، ہر نفس پر، ہر ذات پر
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?