By: wasim ahmad moghal
تُو اگر بد گُمان ہو جائے
یہ زمیں آسمان ہو جائے
اُس کی یادوں کے سائے میں رہئیے
زندگی کچھ آسان ہو جائے
دیکھ لے وہ اگر محبّت سے
دھوپ ہی سائبان ہو جائے
اِک نظر اُس کودیکھ لے زاہد
تم کو حاصل اِیمان ہو جائے
دیکھ لوبے حجابیاں اُس کی
شیخ جی امتحان ہو جائے
دیکھ کر اُس کے نازِ محبوبی
شیخ پھرسےجوان ہو جائے
شاعروں کی حسین محفل میں
دوستو کچھ بیان ہو جائے
یہی دنیا بہشت ہے پیارے
تُو اگر مہربان ہو جائے
مشکلیں پھر سے آنے والی ہیں
ہر کلی سخت جان ہو جائے
تری کشتی کو کون روکے گا
عزم گر بادبان ہو جائے
ڈھونڈ مرنے کی کوئی ایسی سبیل
زندگی جاوِدان ہو جائے
زخم تازہ کوئی لگا جاناں
دل مرا گلستان ہو جائے
تیر ہو جائے نہ خطا اُن کا
اَب کے دل درمیان ہو جائے
زندگی تو عذاب میں گزری
کاش مرنا آسان ہو جائے
تیر بن کر کیوں نہ نکلے روح
جب کمر ہی کمان ہو جائے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?