By: عمیر قریشی
ڈرتے ہیں صرف اس لیے عرضِ بیاں سے ہم
کرجائیں کوئی ظلم نہ اپنی زباں سے ہم
کارِ جہاں کے واسطے فرصت ہی کب ملی
نکلے کبھی نہ قیمتِ غم کے گماں سے ہم
جو ساتھ لے گئے تھے یقیں وہ بھی رہ گیا
لوٹے ہیں خالی ہاتھ ترے آستاں سے ہم
دنیا سے دل لگانے کا کچھ فائدہ نہیں
جانا وہیں ہے لوٹ کے، آئے جہاں سے ہم
جب ولولوں کی قید سے آزاد ہو گئے
گزرے نہ اس گلی سے جو گزرے وہاں سے ہم
سرمستیِ حیات ہے موسم سے بے نیاز
پیتے ہیں جوئے یاد کے آبِ رواں سے ہم
اب دیکھیے کہانی کہاں جا کے ختم ہو
مر کر نکل تو آئے ہیں اس داستاں سے ہم
اب کوئی ہجر و وصل سے باقی نہیں غَرَض
اکتا گئے ہیں قصّہء عشقِ بتاں سے ہم
چھایا ہے کچھ عجیب یہاں ماتمی سکوت
اب خود بھی خوف کھاتے ہیں اپنے مکاں سے ہم
بیجا ہے بے رخی کا گلہ ہم سے جانِ جاں
بیزار خود بھی رہتے ہیں اب اپنی جاں سے ہم
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?