By: Nazir Yaad Mianwali
اجل کے تاریک مقبرے کون بھیجتا ہے
ہماری بستی پہ زلزلے کون بھیجتا ہے
ہمارے چاروں طرف بکھیرا ہے خوف کس نے
ہمارے ذہنوں میں وسوسے کون بھیجتا ہے
کوئی نہیں جانتا کہ اس کا قصور کیا ہے
عجیب یکطرفہ فیصلے کون بھیجتا ہے
کہاں سے وارد ہوئی ہے موت و حیات آخر
کبھی نہ حل ہوں جو مسئلے کون بھیجتا ہے
سوال یہ ہے سجل رُتیں بے ثبات کیوں ہیں
گُلوں کو پت جھڑ کے سانحے کون بھیجتا ہے
عظیم سورج کے ڈوبنے کا جواز کیا ہے
سیہ شبوں کے مراسلے کون بھیجتا ہے
ہماری عمریں تو چند برسوں کے راستے ہیں
نذیر صدیوں کے فاصلے کون بھیجتا ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?