By: Yaseen Shahi
کتنی حسین شام ہے چل میکدے چلیں
کچھ دل بھی تشنہ کام ہے چل میکدے چلیں
گر طور پہ کلام ہے تو دید ہے محال
دونوں کا اہتمام ہے چل میکدے چلیں
اذن دخول نہ ملا مسجد میں رند کو
مندر میں بھی تو رام ہے چل میکدے چلیں
ساغر سبو صراحی و بادہ و جام و مے
ساقی کا اہتمام ہے چل میکدے چلیں
ہر کوئی گھونٹ گھونٹ کو ترسا رہا ہے کیوں
یا کربلاے عام ہے چل میکدے چلیں
سب کچھ سہی مگر یہاں ملتی نہیں شراب
یہ بھی کوئی مقام ہے چل میکدے چلیں
سچ ہے تمہارے ہاتھ میں اے شاہی یہ قلم
تلوار بے نیام ہے چل میکدے چلیں
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?