By: Azra Naz
کھلی نظر سے نہ سپنے حسیں دِکھا مجھ کو
لبوں پہ کوئی حقیقت ہے تو سنا مجھ کو
جلا رہا ہے مجھے غم کا آ تشیں سورج
سزا کی ذد میں ہوں پھر آ کے تو بچا مجھ کو
میں لوٹنا نہیں چاہوں گی پھر سرِ ساحل
بنا کے کشتیٔ کاغذ نہ یوں بہا مجھ کو
گِرا دیا ہے نگاہوں سے مجھ کو اپنوں نے
یقیں کا دے کے سہارا ذرا اُٹھا مجھ کو
محبتوں میں دکھاوے کی میں نہیں قائل
وفا پہ شک ہے تو سو بار آزما مجھ کو
نہ آ سکوں گی ترے پاس اب میں دوبارہ
نہ اِس طرح سے خیالوں میں گنگنا مجھ کو
ہے دوست اچھا وہی جو ہو اک محاسب بھی
میں خود کو جان سکوں آئینہ دکھا مجھ کو
ہے تو غلط تو یہ تسلیم کر کھلے دل سے
غلط ہوں میں تو عطا کر کوئی سزا مجھ کو
بنا کے عذراؔ بہانہ میری حفاظت کا
بڑے سلیقے سے منظر سے مت ہٹا مجھ کو
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?