By: muhammad nawaz
باہروں شہد نتھارے لوک
اندروں کنے کھارے لوک
گلاں گزرے پل دیاں کر کے
دیون پینگ ہلارے لوک
آپنے دل دا چن نہ ویکھن
توڑ لیاون تارے لوک
مٹی تھلے ہتھیں دبے
سفنیوں ود پیارے لوک
میں اوتھے دا اوتھے رہ گیا
لا لا ٹر گئے لارے لوک
سپاں نے تے کیہ لڑنا سی
لڑ گئے پھن کھلارے لوک
تیرے حسن سخاوت کیتی
جت گئے نیں ہارے لوک
ساہنواں دی سولی تے چڑھ گئے
ویکھو ویکھی سارے لوک
ساڈی کلی دے وچ بہہ کے
لبھن محل منارے لوک
ہر جا ویکھے مجنوں صورت
تیرے پیار دے مارے لوک
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?