By: Azra Naz
دِل کا جو حال تھا پہلے وہ کہاں ہوتا ہے
اب تو ہر گام پہ احساسِ زیاں ہوتا ہے
جب منڈیروں پہ جلا کرتے ہیں راتوں کو دئیے
چار سوُ ہی مرے خوابوں کا دُھواں ہوتا ہے
راز چھپتا ہے کہاں دِل کے نہاں خانے میں
جو بھی اندر ہو ، وہ چہرے سے عیاں ہوتا ہے
کشتیاں سب کی کنارے پہ لگا دیتا ہے
جب کبھی موج میں یہ آبِ رواں ہوتا ہے
بیکلی دِل میں مرے کوئی عجب ہوتی ہے
جب گلستاں میں بہاروں کا سماں ہوتا ہے
دِن تو کٹ جاتا ہے ہنگاموں میں جیسے تیسے
رات ڈھلتے ہی مگر درد جواں ہوتا ہے
یوں تو ہر بار سنا کرتی ہوں پیغامِ بہار
میرے چہرے پہ مگر رنگِ خزاں ہوتا ہے
کھو گیا بھیڑ میں جانے وہ کہاں پر عذرا
جس کی آنکھوں پہ ستاروں کا گماں ہوتا ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?