By: Hafeez Hoshiapuri
اب کوئی آرزو نہیں ذوق پیام کے سوا
اب کوئی جستجو نہیں شوق سلام کے سوا
کوئی شریک غم نہیں اب تری یاد کے بغیر
کوئی انیس دل نہیں اب ترے نام کے سوا
تیری نگاہ مست سے مجھ پہ یہ راز کھل گیا
اور بھی گردشیں ہیں کچھ گردش جام کے سوا
خواہش آرزو سہی حاصل زندگی مگر
حاصل آرزو ہے کیا سوز مدام کے سوا
آہ کوئی نہ کر سکا چارۂ تلخئ فراق
نالۂ صبح کے بغیر گریۂ شام کے سوا
رنگ بہار پر نہ بھول بوئے چمن سے در گذر
یہ بھی ہیں خوش نما فریب دانا و دام کے سوا
مر کے حیات جاوداں عشق کو مل گئی حفیظؔ
جی کے ہوس کو کیا ملا مرگ دوام کے سوا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?