By: وشمہ خان وشمہ
آنکھوں میں روشنی کا جہاں کو یقیں رہے
ارضِ وطن مثالِ بہشتِ بریں رہے
تاروں کے سائے سائے میں یہ کارواں چلے
اپنی قرارداد سے سارا جہاں چلے
اپنے نگر میں کوئی نہ قلبِ حزیں رہے
ارضِ وطن مثالِ بہشتِ بریں رہے
۔۔۔۔۔۔۔۔۔۔۔۔۔۔
کھلتے رہیں یہ شام و سحر چاہتوں کے پھول
ہر بندہ باضمیر ہو ، ہر بندہ با اصول
سارا زمانہ اپنی وفا کا امیں رہے
ارضِ وطن مثالِ بہشتِ بریں رہے
۔۔۔۔۔۔۔۔۔۔۔۔۔۔۔۔۔
ذہنوں کی سلطنت پہ محبت کا راج ہو
ہر سُو محبتیں ہوں یہ ایسا سماج ہو
سجدوں سے اس زمیں پہ خمیدہ جبیں رہے
ارضِ وطن مثالِ بہشتِ بریں رہے
۔۔۔۔۔۔۔۔۔۔۔۔۔۔۔۔۔۔
سب کی حیات گزرے وشمہ احترام سے
ہر بندہ آشنا ہو اَخوّت کے نام سے
زندہ نشاطِ ذات میں ہر اک مکیں رہے
ارضِ وطن مثالِ بہشتِ بریں رہے
۔۔۔۔۔۔۔۔۔۔۔۔۔۔۔۔۔۔۔۔۔۔
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?