By: Hazrat Allama Pir Syed Naseer-ud-Din Naseer Gillani (Golra Sharif)
ان کے رخ پر نگاہ کر بیٹھے
ہم بھی خود کو تباہ کر بیٹھے
وہ تباہی خرید لیتا ہے
ان سے جو رسم و راہ کر بیٹھے
میرا افسانہ اہل دل سن کر
برملا ایک آہ کر بیٹھے
اور ہے بات ہم سے اوروں کی
آپ کیوں اشتباہ کر بیٹھے
دل محبت میں کس کی سنتا ہے
ہم کسے انتباہ کر بیٹھے
ہے ستمگر وہ غیرت یوسف
اور ہم ہیں کہ چاہ کر بیٹھے
تھا مخالف جو اے نصیر ! اپنا
ہم اسی کو گواہ کر بیٹھے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?