By: N A D E E M M U R A D
میں چھوٹے چھوٹے ہزار خانوں میں بٹ گیا ہوں
میں ایک جاں تھا ہزار جانوں میں بٹ گیا ہوں
وہ دن بھی کیا دن تھے بولنا تک نہ جانتا تھا
اور آج اپنے کئی بیانوں میں بٹ گیا ہوں
میں خام آہن تھا تیر مجھ سے گھڑے گئے ہیں
فقط تپا ہی نہیں کمانوں میں بٹ گیا ہوں
میں اک وطن تھا اگرچہ آبادیاں تھیں لاکھوں
وہی ہوں اپنے نگاہ بانوں میں بٹ گیا ہوں
میں ایک شبنم کا تازہ قطرہ پڑا جو گُل پر
تو دُھوپ کے خوف سے گمانوں میں بٹ گیا ہوں
میں ایک دولت تھا بے بہا نعمتوں کا منبع
اور آج بس چند خاندانوں میں بٹ گیا ہوں
ندیم میرا وجود ہے تار تار اتنا
کئی زمانوں کی داستانوں میں بٹ گیا ہوں
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?