By: Imam Ahmad Raza Khan
مصطفی خیر الوریٰ ہو
سرور ہر دو سرا ہو
اپنے اچھوں کا تصدق
ہم بدوں کو بھی نباہو
کس کے پھر ہو کے رہیں ہم
گر تمہی ہم کو نہ چاہو
بد ہنسیں تم ان کی خاطر
رات بھر روو کراہو
بد کریں ہر دم برائی
تم کہو ان کا بھلا ہو
ہم وہی ناشستہ رو ہیں
تم وہی بحر عطاء ہو
ہم وہی شایان رو ہیں
تم وہی شان سخا ہو
ہم وہی بے شرم و بد ہیں
تم وہی کان حیاء ہو
ہم وہی ننگ جفا ہیں
تم وہی جان وفا ہو
ہم وہی قابل سزا کے
تم وہی رحم خدا ہو
چرخ بدلے دہر بدلے
تم بدلنے سے ورا ہو
اب ہمیں ہوں سہو حاشا
ایسی بھولوں سے جدا ہو
عمر بھر تو یاد رکھا
وقت پر کیا بھولنا ہو
وقت پیدائش نہ بھولے
کَیْفَ یَنسٰی کیوں قضاء ہو
یہ بھی مولیٰ عرض کر دوں
بھول اگر جاؤ تو کیا ہو
وہ ہو جو تم پر گراں ہے
وہ ہو جو ہرگز نہ چاہو
وہ ہو جس کا نام لیتے
دشمنوں کا دل برا ہو
وہ ہو جس کی رد کی خاطر
رات دن وقف دعا ہو
مر مٹیں برباد بندے
خانہ آباد آگ کا ہو
شاد ہو ابلیس ملعون
غم کسے اس قہر کا ہو
تم ہو واﷲ تم کو
جان و دل تم پر فدا ہو
تم کو غم سے حق بچائے
غم عدو کو جاں گزا ہو
تم سے غم کو کیا تعلق
بے کسوں کے غم زُدا ہو
حق درودیں تم پر بھیجے
تم مدام اس کو سراہو
وہ عطاء دے تم عطاء لو
وہ وہی چاہے جو چاہو
بر تو او پاشد تو برما
تا ابد یہ سلسلہ ہو
کیوں رضاؔ مشکل سے ڈرئیے
جب نبی مشکل کشاء ہو
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?