By: Aisha Baig Aashi
مرے پروں میں ہے بےکل اُڑان کی خواہش
اک آسماں سے نئے آسمان کی خواہش
گھٹن سدا ہی دروبامِ آرزو پہ رہی
مچل رہی ہے کھلے سائبان کی خواہش
کسی بھی رشتے کی نسبت سے جو، نہ ہو میرا
جو صرف میرا ہو، ہے اس مکان کی خواہش
ہر اک تمنا کو درگور کرتی ہے عورت
عزیز رکھتی ہے بس خاندان کی خواہش
ہر ایک سانس مری نذرِ کشمکش کب تک؟۔
نہ حوصلہ ہے , نہ اور امتحان کی خواہش
مرا جہان ہمیشہ رہے مرے دل میں
یہی بہت ہے نہیں کل جہان کی خواہش
روایتوں میں جو ملتا نہیں, ملا وہ یقین
ہو کس لیے مجھے پھر داستان کی خواہش
یہ عشق میری شریعت بھی ہے طریقت بھی
فنا طلب ہُوں نہیں کچھ نشان کی خواہش
سما کے مجھ میں جِلا اُس نے بخش دی عاشی
جگائی پیکرِ بے جاں میں جان کی خواہش
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?