By: Ahmed Nadeem Qasmi
بڑی مانوس لَے میں ایک نغمہ سُن رہا ہوُں مَیں
کِسی ٹوُٹی ہوُئی چھاگل کی کڑیاں چُن رہا ہوُں مَیں
یہاں اب اُن کے اظہارِ محبّت کا گُزر کیا ہو
کہ سناّٹے کی موسیقی پہ بھی سَر دُھن رہا ہوُں مَیں
شبِ وعدہ ابھی تک ختم ہونے میں نہیں آئی
کہ برسوں سے مسلسل ایک آہٹ سُن رہا ہوُں مَیں
تصوّر میں تیرے پیکر کا سونا گھُل گیا ہو گا
ابھی تک لمس کی کیفیّتوں میں بھُن رہا ہوُں مَیں
خدا کا شکر، احساسِ زمیں مرنے نہیں پایا
ستارے چُننے نِکلا تھا، شرارے چُن رہا ہوُں مَیں
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?