By: Azra Naz
مری طرح ترا رشتہ بھی ہے زمیں کے ساتھ
جو ہو سکے تو مجھے مِل اِسی یقین کے ساتھ
مرے حبیب کا احوال تم نے پوچھا ہے
وہ کل ملا تھا نئی ایک نازنین کے ساتھ
وہ جس کو گرم سلاخوں سے تو نے داغا ہے
کئے تھے سجدے تجھے کل اسی جبین کے ساتھ
ہر ایک بات پہ شک جس کی ایک عادت ہے
نبھے گی کیسے مری ایسے نکتہ چین کے ساتھ
تمام عمر سکوں دِل کو مل نہ پاۓ گا
دغا نہ کرنا کبھی اپنے ہمنشین کے ساتھ
انہی کو لگتی ہے ناگن مری یہ زلفِ سیاہ
تھا جن کو پیار اسی زلفِ عنبرین کے ساتھ
تمام عمر اٹھانے پڑیں گے ناز و ادا
کبھی بھی دل نہ لگانا کسی حسین کے ساتھ
سجا کے اس کو جو رکھتا ہے پیار سے عذراؔ
ہے انس گھر کو بھی شاید اسی مکیں کے ساتھ
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?