By: Azra Naz
ہوا میں اڑتے ہوۓ نرم آنچلوں کی طرح
تمہارا سایہ تھا ماں سر پہ بادلوں کی طرح
بڑے سکوں سے جڑیں کاٹتا رہا میری
وہ شخص جس کا رویہ تھا دوستوں کی طرح
میں کس طرح تیری چاہت کا اعتبار کروں
ترِا مزاج بدلتا ہے موسموں کی طرح
چلے تھے گھر سے ، زمانے کو ہم فتح کرنے
مگر وہ جوش تھا پانی پہ بلبلوں کی طرح
فقط ہواؤں کو مٹھی میں قید کرنے کو
میں بھاگتی ہی گئی دور پاگلوں کی طرح
کچھ اور بڑھ گیا ساون میں حسن بارش کا
تھی ایسی پتوں میں جھنکار پائلوں کی طرح
وہ لفظ تم نے محبت میں جو کہے مجھ سے
اداس شب میں چمکتے ہیں جگنوؤں کی طرح
میں تند موجوں کی مانند بے قرار رہی
رہا خموش ہمیشہ وہ ساحلوں کی طرح
ترے ہی نام کی جھنکار اس میں شامل ہے
بکھرتی سانس جو بجتی ہے پائلوں کی طرح
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?