By: ظہیر صدیقی
درد تو زخم کی پٹی کے ہٹانے سے اٹھا
اور کچھ اور بھی مرہم کے لگانے سے اٹھا
اس کے الفاظ تسلی نے رلایا مجھ کو
کچھ زیادہ ہی دھواں آگ بجھانے سے اٹھا
عہد ماضی بھی تو بے داغ نہیں کیوں کہیے
پاسداری کا چلن آج زمانے سے اٹھا
وجہ ممکن ہے کوئی اور ہو میں یہ سمجھا
وہ تری بزم میں شاید مرے آنے سے اٹھا
زلف ژولیدہ تو زیبائش رخسار ہوئی
مسئلہ سارا فقط اک ترے شانے سے اٹھا
اپنی پا مردی پہ وہ شخص بھی نازاں ہے ظہیرؔ
جو گرانے سے گرا اور اٹھانے سے اٹھا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?