By: Amer Roohani
خیالِ کہکشاں غائب ، کمالِ این و آں غائب
زمیں کی قید سے نکلے ، تو نیلا آسماں غائب
میں اپنے آپ کو پانے کی دھن میں مست رہتا ھوں
یہاں غائب، وہاں غائب ، عیاں غائب، نہاں غائب
گری برقِ تپاں ایسے ، جلا ڈالے سبھی تنکے
مچاں غائب ، دھواں غائب ، رمادِ آشیاں غائب
کتابِ زیست ھے روشن ترے اسمِ منّور سے
جہاں بھی نام ھے میرا وھاں سے داستاں غائب
میں اس کو دیکھتا ھوں چار سُو، بس مل نہیں پاتا
اِدھر غائب ، اُدھر غائب، نہ جانے کب کہاں غائب
یہی ادراک ھے تحت الثرٰی ، تحت الشعوری کا
جہاں منڈی فراست کی ، دکانِ عاشقاں غائب
مجھے افسوس ھے اس کا کہ تنہا ھوں سرِ منزل
جو کرتے تھے نشاں غائب ، ھُوا ان کا نشاں غائب
کچھ ایسے اوج و رجعت میں رہے تارے مقدر کے
عطا غائب ، دعا غائب ، صدا غائب ، فغاں غائب
پروھت ، پنڈت و ملّا ، سکندر ، گوتم و دارا
سوائے ذاتِ یزداں کے ، حیاتِ جاوداں غائب
اَمـَـر کامل یقیں ھے ان کی نسبت کی نگہبانی
وہیں پہ آستاں حاضر، جہاں سے سائباں غائب
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?