By: Azra Naz
پر دے کے مجھ سے قوتِ پرواز تو نہ چھین
سب چھین لے مگر مرا انداز تو نہ چھین
گر چھیننا ہے تو مرے ہوش و حواس چھین
دل جھومے جس کی لے پہ وہی ساز تو نہ چھین
خود کھو کے مجھ کو کہتا پھرا وہ ہر ایک سے
ظالم زمانے مجھ سے مری ناز تو نہ چھین
اے وقت بے رحم ہی سہی تو ، مگر ٹھہر
یوں مجھ سے میرا مونس و دمساز تو نہ چھین
ظاہر نہیں کسی پہ ابھی میرے دل کی بات
دل میں سما کے دل کا مرے راز تو نہ چھین
انجام سوچ لوں دے اجازت مجھے ذرا
مجھ سے مری کہانی کا آغاز تو نہ چھین
پیاری ہے زندگی مجھے اے موت رک ذرا
اس عمر کو سمجھ کے دغا باز تو نہ چھین
ہمراز تھا کبھی ، مرا دشمن ہے آج تو
دشمن سہی مگر مرا ہمراز تو نہ چھین
پہچانتے ہیں سب مری آواز سے مجھے
اے وقت مجھ سے تو مری آواز تو نہ چھین
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?