By: Khalid Roomi
چلنے لگا ہوں طیبہ کے گلزار کی طرف
دل کھنچ رہا ہے رحمت غفار کی طرف
کیوں کر نہ جائیں لوگ فدا ان کے نام پر
خود ہے خدا بھی احمد مختار کی طرف
بکنے کو آئے یوسف کنعان خود یہاں
جائے گا کون مصر کے بازار کی طرف
آئیں نہ بھول کر بھی حوادث یہاں کبھی
بڑھتے ہیں ہاتھ اپنے مددگار کی طرف
دامن مراد سے یہ بھرے کیوں نہ جائیں اب
آنکھیں لگی ہوئی ہیں در یار کی طرف
آئیں گے جب بہار مدینہ کے گل نظر
دیکھے گا کون خلد کے گلزار کیطرف
شاہ امم ! تمھارے سوا میرا کون ہے ؟
اٹھتی نہیں نظر کسی غم خوار کی طرف
کیونکر طواف اس کا نہ کرتی پھرے شفا
وہ آ گئے ہیں چل کے جو بیمار کی طرف
محشر میں یہ کہوں گا میں رضواں سے برملا
لے کر مجھے چلو مرے سرکار کی طرف
آساں نہیں ہیں نعت کے اشعار باندھنا
ان کا کرم ہے شاعر دربار کی طرف
دیکھے نہ گلرخوں کو پلٹ کر میری نظر
نہ حور کی طرف نہ طرحدار کی طرف
کیوں کر نہ ناز اپنے مقدر پہ یہ کرے
ان کی عطا ہے رومی نادار کی طرف
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?