By: عمیر قریشی
درد میری زندگی کا ترجماں بنتا گیا
دل کو گھائل کر گیا آہ و فغاں بنتا گیا
ایک آنسو کیا بہا پھر کارواں بنتا گیا
واقعہ سمجھے جسے وہ داستاں بنتا گیا
دل کی باتیں جس سے ہم کرتے تھے اپنا جان کر
رفتہ رفتہ دشمنوں کا رازداں بنتا گیا
اس کی یادوں سے مرے دل کی زمیں روشن رہی
جو تخیل کے فلک پر کہکشاں بنتا گیا
نفرتیں اپنا مقدر سوچنا کیوںکر ہوئیں
کیوں دلوں میں بدگمانی کا جہاں بنتا گیا
عکس جس کا ذہن و دل پر مستقل چھایا رہا
وصل اس کا دن بہ دن وہم و گماں بنتا گیا
دشتِ فرقت میں بھٹکتا ہی رہا میں عمر بھر
ہجر میرے واسطے آزارِ جاں بنتا گیا
غم کا لاوا پھوٹ نکلا دل سے آخر ایک دن
جس جگہ پہنچا وہیں آتش فشاں بنتا گیا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?