By: Prof Niamat Ali Murtazai
تیری خدائی ہم کو یوں راس آگئی ہے
عظمت کی باس تیری ہر سو سما گئی ہے
سورج میں تیرا جلوہ، بجلی غضب ہے تیرا
آتش فشاں میں تیری قوت سما گئی ہے
کب زلزلے تھمے ہیں، طوفان کب رکے ہیں
تیری ہی یاد ہے جو سب غم بھلا گئی ہے
ماتم کدہ جہاں میں اشکوں کی ہر جا بارش
لیتے ہی نام تیرا، اُ مید آ گئی ہے
تیری رضا ہے جنت، ناراضگی جہنم
اُمید وبیم میں ہی دنیا سما گئی ہے
کِھلنا تری ادا ہے، مرجھانا بھی قضا ہے
تیری ثنا تری ہر تخلیق گا گئی ہے
بحرو فلک تری ہی عظمت کے ہیں نشاں سب
ارض وسما میں تیری قدرت ہی چھا گئی ہے
ہر ذرہ ہے گواہی تیری موجودگی کی
آئی سکون بن کر جب بھی فغاں گئی ہے
شمع میں نورتیرا ، پروانے کی تڑپ بھی
ہستی ہر ایک تجھ میں مالک سما گئی ہے
پیوستہ ہے تجھی سے ہر آسِ مرتضائیؔ
تیری طرف ہی دل سے ہر اک دعا گئی ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?