By: Basheer Badr
تیری جنت سے ہجرت کر رہے ہیں
فرشتے کیا بغاوت کر رہے ہیں
ہم اپنے جرم کا اقرار کر لیں
بہت دنوں سے یہ ہمت کر رہے ہیں
وہ خود ہارے ہوئے ہیں زندگی سے
جو دنیا پہ حکومت کر رہے ہیں
زمیں بھیگی ہوئی ہے آنسوؤں سے
یہاں بادل عبادت کر رہے ہیں
فضا میں آیتیں مہکی ہوئی ہیں
کہیں بچے تلاوت کر رہے ہیں
ہماری بے بسی کی انتہا ہے
کہ ظالم کی حمایت کر رہے ہیں
پرندوں کے زمیں و آسماں کیا
وطن میں رہ کے ہجرت کر رہے ہیں
غزل کی آگ میں پلکوں کے سائے
محبت کی حفاظت کر رہے ہیں
میں اپنے بھائیوں سے مختلف ہوں
وہ موسم کی شکایت کر رہے ہیں
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?