By: وشمہ خان وشمہ
خوف ہجرت کی یہ کہانی ہے
اس کے لہجے میں مہر بانی ہے
ایک دن تو میں ڈھونڈ لوں گی اسے
میرے خوابوں کی یہ زبانی ہے
تیری یادوں سے سبز رہتی ہے
دل کی دھرتی پہ شادمانی ہے
اور کسی سے میں کیا کروں شکوہ
زخم تیرا ہی اک نشانی ہے
اس کی نظروں میں مر چکی ہوں یہاں
وہ جو کہتا تھا پیار فانی ہے
خشک دریا ہیں چار سو لیکن
میری آنکھوں میں اب بھی پانی ہے
درد جلتا ہے میرے سینے میں
جو ترے پیار کی نشانی ہے
کبھی زندہ تھے تیری یادوں میں
اب تو ہر سوچ آنجہانی ہے
عشق اترے گا ایک دن وشمہ
اس کی کرپا ہے ، مہر بانی ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?