By: Muhammad Zia Siddiqui
ہنڑ بس کر بہتی ہو گئی اے
ہتھ جوڑ کے قوم کھلو گئی اے
مہنگائی دے چھکے چوکیاں وچ
چینی دی ففٹی ہو گئی اے
چاہ پینڑی اوکھی ہوگئی اے
شاپنگ دی حسرت رہ گئی اے
ساڈی تے بکری بہہ گئی اے
حاکم دے بچرخانے وچ
غربت دی چھری کوہ گئی اے
چاہ پینڑی اوکھی ہوگئی اے
ہر بندہ روندا پھر داے
اے رولا بڑے چر داے
کاکے دی فیس بھی ودھ گئی اے
منی فر فیل بھی ہو گئی اے
چاہ پینڑی اوکھی ہوگئی اے
گھر وچ ہے مسلئہ خرچے دا
نہیں ذائقہ نمکے مرچے دا
پہلے آٹے دا رونڑا سی
ہنڑ منج منہ موڑ کھلو گئی اے
چاہ پینڑی اوکھی ہوگئی اے
جے ساڈے بارے سوچن آ
حاکم مہنگائی نوں روکن آ
کی پتہ برگر خوراں نوں
کہ قوم اج بھکی سوگئی اے
چاہ پینڑی اوکھی ہوگئی اے
اپنی مرضی تے اوکھی اے
اک چاکری کرنی سوکھی اے
امریکہ راضی رکھنا اے
سانوں سرکار ڈبو گئی اے
چاہ پینڑی اوکھی ہوگئی اے
اے چنگا دور عوامی اے
ہر مقصد وچ ناکامی اے
کوئی حاجت پوری نہیں ہوندی
لگدا اے قسمت سو گی اے
چاہ پینڑی اوکھی ہوگئی اے
یارب فصلاں تے مینہ برسا
صدیقی مہنگی پئی دعا
بارش دے مزے امیراں نوں
ہنڑ چھت غریب دی چو گئی اے
چاہ پینڑی اوکھی ہوگئی اے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?