By: Akhtar Muslimi
نہ شیخ کا ہے تذکرہ نہ برہمن کی بات ہے
مِری زباں پہ چند اہلِ مکر و فن کی بات ہے
کسی پہ گل کی بارشیں کسی کو خار و خس ملے
یہ باغباں کا ظرف ہے چمن چمن کی بات ہے
کسی کو خُم کے خم ملے، کوئی ترس کے رہ گیا
ہٹاؤ جانے دو تمہاری انجمن کی بات ہے
جو بو الہوس تھے ان کو تم وفا پرست کہتے ہو
چلو یہی سہی تمہارے حسنِ ظن کی بات ہے
وفا کرو جفا ملے، بھلا کرو برا ملے
ہے ریت دیش دیش کی چلن چلن کی بات ہے
ستم بھی اخترؔ اپنوں سے جو ہوں تو بھول جائیے
بھلی ہو یا بری سب اپنے ہی وطن کی بات ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?