By: Azra Naz
نجانے کھو دیا ہم نے کہاں جا کر سکوں اپنا
نہ کر برباد تو اے چاندنی ہم پر فسوں اپنا
نہ ہم ملتے نہ گلُ کھلتے نہ ایسی داستاں بنتی
نجانے اور کیا کیا رنگ لاۓ گا جنوں اپنا
حِنا مہکی جو ہاتھوں پر تو یہ دِل نے کہا مجھ سے
ہتھیلی پر سجا رکھا ہے ظالم تم نے خوں اپنا
ذرا ٹھہرو مِرے اشکو ضرورت کیا ہے بہنے کی؟
رہو گے کھو ل کر دُنیا پہ کیا حالِ دروُں اپنا
توُ میرے ساتھ تھا تو گویا دُنیا ساتھ تھی میرے
ہوا ہے حال کیسا کیا کہوں تیرے بدوں اپنا
چلا کرتے تھے ہم بھی سر اُٹھا کر اِک زمانے میں
تمہاری بے وفائی نے کیا ہے سر نگوں اپنا
نہیں کوئی بھی ایسا جو سمجھ پائے زباں میری
بھلا یہ دردِ کس طرح زمانے سے کہوں اپنا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?