By: Faiz Ahmed Faiz
چشم نم جانِ شوریدہ کافی نہیں
تہمتِ عشق پوشیدہ کافی نہيں
آج بازار میں پابجولاں چلو
دست افشاں چلو مست و رقصاں چلو
خاک برسر چلو خوں بداماں چلو
راہ تکتا ہے سب شہرِ جاناں چلو
حاکمِ شہر بھی مجمعِ عام بھی
تیرِ الزام بھی سنگِ د شنام بھی
صبحِ ناشاد بھی روزِ ناکام بھی
ان کا دمساز اپنے سوا کون ہے
شہرِ جاناں میں اب با صفا کون ہے
دستِ قاتل کے شایاں رہا کون ہے
رخت دل باندھ لو دل فگارو چلو
پھر ہمِیں قتل ہو آئیں یارو چلو
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?