By: Dr.Zahid Sheikh
عید کے دن بھی بہت دور ہیں ہم کیسے ملیں
پھول خوشیوں کے جدائی میں بھلا کیسے کھلیں
چوڑیاں ہاتھوں میں پہناؤں یہی حسرت ہے
کتنی مجبور جدائی میں مری الفت ہے
تیرے ہاتھوں پہ حنا کتنی مہکتی ہو گی
پیار کی آگ بھی سینے میں دہکتی ہو گی
پر زمانے کی نگاہوں کے کڑے پہرے ہیں
آج بھی اپنی محبت پہ بڑے پہرے ہیں
میری محبوب ! جو آنکھوں کو تری دید نہیں
عید کے دن بھی تمناؤں کی تو عید نہیں
صبح کی طرح مری شام بھی ویراں ہو گی
دل بجھا ہو گا تو مشکل میں مری جاں ہو گی
تیرے بن عید کا یہ دن بھی مجھے راس نہیں
کس طرح چین ملے آج بھی تو پاس نہیں
یوں تو رنگوں کی ، گلابوں کی ہے ہر سمت بہار
پر ذرا سا بھی نہیں آج مرے دل کو قرار
اپنے کمرے میں اکیلا ہوں ،تری یادیں ہیں
پھر خیالوں میں تری پیار بھری باتیں ہیں
سوچتا ہوں کہ یہ تہوار مناؤں کیسے
ہو کے تیار کہیں گھر سے میں جاؤں کیسے
کوئی پیغام ہی مل جائے ترا پیار بھرا
فون پر آج کے دن بات ہی تو کر لے ذرا
تیری آواز سے کچھ دل کو سکوں آئے گا
عید کا دن تو کسی طور گزر جائے گا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?