By: Muhammad Mumtaz Rashid
میرے مالک میری رضا تو ہے
میں ہوں بندہ میرا خدا تو ہے
اور کیا اس کے ماسوا تو ہے
ابتدا تو ہے، انتہا تو ہے
منبع خلق و ارتقاء تو ہے
محور دین مصطفٰی تو ہے
میں ہوں تنہا مگر نہیں تنہا
ساتھ ہر وقت دوسرا تو ہے
جب بھی کہتا ہے کوئی نعت نبی
حرف در حرف بولتا تو ہے
حکمرانوں کا حکمراں تو ہے
رہنماؤں کا رہنما تو ہے
تیرا فیضان ہے سبھی کے لئے
کرد گار شہ و گدا تو ہے
اہل ایماں ہیں تیرے گھر کے دیے
ان دیوں کی مگر جلا تو ہے
اس سے دنیا خفا ہے تو بھی کیا
جس کسی شخص کی رضا تو ہے
ظلمت دہر کیا ڈرائے گی
ظلمت دہر میں ضیا تو ہے
تجربہ ہے غموں کے ماروں کا
سب بلاؤں کو ٹالتا تو ہے
کون ہے رب سوال جب ابھرا
دل نے فوراً یہ کہہ دیا تو ہے
باطناً تو ہی تو ہے نظروں میں
ظاہراً آنکھ سے چھپا تو ہے
جب بھی راشد ہو مبتلائے غم
درد و غم اس کے بانٹتا تو ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?