By: Aisha Baig Aashi
تا مرحلہ نیرنگِ قلم کُھل نہیں پایا
تا دم سبَبِ دیدہ ء نم کُھل نہیں پایا
پاداش ہے یا جانچ ہے یا محض فسُوں ہے
اب تک بخدا سِرِّ الم کُھل نہیں پایا
آئینہ ء آئینِ جزا پر ابھی شاید
ایماں کا تراشیدہ صنم کُھل نہیں پایا
یارا نہ رہا صبر کا تلخی بھی بڑھی جائے
یہ تیرا کرم ہے کہ ستم کُھل نہیں پایا
واں بات ہُوا کرتی ہے اسرارِ خودی کی
یاں فلسفہ ء ہست و عدم کُھل نہیں پایا
ہستی کی حقیقت میں کہُوں کیا کہ ابھی تک
سر تا بہ قدم ورطہ ء دم کُھل نہیں پایا
اب چرخِ کبُود اور کوئی راہ نکالے
شبنم سے تو نیلم کا بھرم کُھل نہیں پایا
اے جوشِ جُنوں تُو ہی کوئی ہاتھ دکھا دے
ادراک سے تو عقدہ ء غم کُھل نہیں پایا
اک عُمر سے کوشاں ہیں تگ و تاز کے مہرے
زنداں سے رہائی کا علَم کُھل نہیں پایا
کیا کیجیے، سر پیٹیے یا روئیے عاشی
تدبیر سے تقدیر کا خم کُھل نہیں پایا
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?