By: نصیر الدین نصیر
دل کی دھڑکن کہ جاں سے آتی ہے
اُن کی خوشبو ، کہاں سے آتی ہے
حدِ اوہام سے گزر کے کُھلا
خوش یقینی ،گُماں سے آتی ہے
جراتِ بندگیِ ربِ جلیل
بت شکن کی اذاں سے آتی ہے
ایسی طاقت کہ جو نہ ہو تسخیر
دل میں عزمِ جواں سے آتی ہے
اُن کی آواز میرے کانوں میں
آرہی ہے ، جہاں سے آتی ہے
سر کو توفیق سجدہ کرنے کی
یار کے آستاں سے آتی ہے
آدمیت وہاں نہیں ہوتی
کبر کی بُو جہاں سے آتی ہے
وقت کیسا قیامتی ہے آج
دھوپ اب سائباں سے آتی ہے
رات پڑتے ہی کچھ نہیں کُھلتا
یادِ جاناں کہاں سے آتی ہے
آدمی میں جمالیاتی حس
قربتِ مہ وشاں سے آتی ہے
دو قدم چل کے تم نہیں آتے
چاندنی آسماں سے آتی ہے
زندگی میں نصیر ! آسانی
ترکِ سُود و زیاں سے آتی ہے
یاد فن کے اساتذہ کی نصیر
تیرے طرزِ بیاں سے آتی ہے
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?