By: Dr.Muhammed Husain Mushahid Razvi
عشقِ شہِ بطحا کا جو شیدائی ہے بے شک
ٹھوکر میں اس انسان کی دانائی ہے بے شک
دیکھے تو ذرا کوئی مرے شیٖشۂ دل میں
تصویٖر شہِ دیں کی اُتر آئی ہے بے شک
محدود نہیں عشقِ نبی صرف بشر تک
اللہ بھی سرکار کا شیدائی ہے بے شک
ہر شَے میں نظر آتے ہیں اُس کو شہِ والا
آنکھوں میں جس انسان کے بینائی ہے بے شک
وہ آنکھ بھی ہے کتنی مقدس و مبارک
جو دیدِ شہ دیں کی تمنّائی ہے بے شک
سرکارِ مدینہ کے درِ پاک پر اب بھی
ہر وقت فرشتوں کی جبیٖں سائی ہے بے شک
حاصل نہیں جنّت کے چمن کو اے مُشاہدؔ
گل زارِ مدینہ میں جو رعنائی ہے بے شک
Install Bazm-e-Urdu now to search through over 50000+ Urdu Poems and share as text or customized images. More than 1000+ images to choose from. So what are you waiting for?